​ ሀዋሳ፣ መስከረም 07፣ 2019 (ኤስቢሲ)

​ የሀዲያ ብሔር ተወላጆች የዘመን መለወጫ “ያሆዴ” በዓል በሲዳማ ክልል ርዕሰ መዲና ሀዋሳ ከተማ ከነዋሪዎች ጋር በጋራ በድምቀት ተከብሯል።

​በሲዳማ ባህል አዳራሽ በተካሄደው በዚህ ሥነ-ሥርዓት፣ የበዓሉ መክፈቻ በሀዲያ ሀገር አባቶችና የባህል ሽማግሌዎች ምርቃት የተከናወነ ሲሆን፣ ፕሮግራሙ በባህላዊ ዜማዎችና ውዝዋዜዎች ታጅቦ ተካሂዷል።

​በመድረኩ የተገኙት የሀዲያ ዞን ባህልና ቱሪዝም መምሪያ ኃላፊ አቶ መስፍን ቦጋለ ባደረጉት ንግግር፤ የሀዲያ የዘመን አቆጣጠር ወቅቶችን መሰረት ያደረገ መሆኑን ጠቁመው፣ በዓሉ መስከረም በገባ በሁለተኛው ሳምንት ጀምሮ እንደሚከበር ገልጸዋል።

​“ያሆዴ” ከአሮጌው ወደ አዲስ ዘመን መሸጋገሪያ ብቻ ሳይሆን የማህበረሰቡን አብሮነት፣ ፍቅርና መተሳሰብ እንዲሁም የወንድማማችነትና የእህትማማችነት እሴቶችን የሚያጠናክር ታላቅ ባህላዊ ሀብት መሆኑንም አብራርተዋል።

​የሀዲያ ዞን የሕዝብ ተወካዮች ምክር ቤት ዋና አፈ ጉባኤ ወ/ሮ እቴነሽ ሙሉጌታ በበኩላቸው፤ “ያሆዴ” በማህበረሰቡ ዘንድ በታላቅ ጉጉት የሚጠበቅ፣ አሮጌውን ዘመን በይቅርታና በእርቅ ሽኝቶ ወደ አዲሱ ዘመን የሚሸጋገሩበት ድልድይ መሆኑን ገልጸዋል።

​በዓሉ በሁሉም የዕድሜ ክልል በሚገኙ የብሔሩ ተወላጆች ዘንድ የሚከበርና የሕዝቦችን የእርስ በርስ መስተጋብር፣ መከባበርንና ሰላምን የሚያጎለብት ትሩፋት እንዳለው ተናግረዋል።

​በተጨማሪም የሀዲያ፣ የሲዳማና የኦሮሚያ ብሔሮች የባህል ሽማግሌዎች፣ ጥሪ የተደረገላቸው እንግዶች እንዲሁም ከሻሸመኔ፣ ከወንዶገነት፣ ከኩየራ፣ ከአርሲ ነገሌና ከተለያዩ አካባቢዎች የመጡ የብሔሩ ተወላጆችና የአካባቢው ነዋሪዎች የበዓሉ ታዳሚ ሆነዋል። (የሀዋሳ ከተማ ኮሙኒኬሽን)