Ga'a Gobba Ragidhanno Ilama Rosu Uduunne Hoogge Rosu Gobbaanni Ikkitannokki Gede Baalunku Qeechasi Fula Hasiissanno kalaa Beyyene Baraasa

**********

‎

Hawaasa, Fooqa 4, 2018 (SBC) Ga'a gobba ragidhanno ilama rosu uduunne hoogge rosu gobbaanni ikkitannokki gede baalunku qeechasi fula hasiissannota, Sidaamu Qoqqowi Aantichu Pirezedaantenna Rosu Biiro Sooreessi kalaa Beyyene Baraasihu xawisino.

‎Biiro Fooqa 4 Baci-Dagoomimmate barra korkaata assatenni Aliyye Sidaami Zoone Haweeli Woradi Haweela Caffe Umi Dirimi Rosi Mine anga ajjino rosaanora rosu uduunni kaa'lo assitino.

‎

‎Amanyootu aana leellinohu Sidaamu Qoqqowi Aantaanchu Pirezedaantenna Rosu Biiro Sooreessi Kalaa Beyyene Baraasihu, lophitino gobbuwa woyyino deerra iillitinohu rosunni ikkinota xawise ilama lifxa roso afidhe ga'a gobba ragidhanore ikkitanno gede illacha tunge loonsanni hee'noonnita kaysino.

‎

‎2019 Rosu Dirira anga maate rosaano dafitarunna biirete hoonginni rosu gobbaanni ikkitanokki gede qoqqowu deerrinni hawadi wogganni hanafe 60 kume dafitara, 3kume paakko biire, borsanna woloota rosu uduunne mootimmanna mootimaame ikkitinokki uurrinshubba irkonni gamba assine tuqisate looso hala'ladunni loonsanni hee'noonnita buuxisino.

‎

‎Qoqqowoho wo'munku qooxxeessira afamanno dagoomi ollaa ollaaho afantanno anga ajjino maatera kaa'lo assatenni mimmito kaa'lamate bude sufisiisanno gede sokkasi saysino. 

‎

‎Aliyye Sidaami Zoone Qaru Gashshaanchi Kalaa Tsaadiqu Baxisohu zoonete deerrinni rosu loosira baxxino illacha uyiine loonsanni hee'noonnita kule 2019 rosu dirira qixxaawo danchu garinni assine 20 kume roortanno rosaanora addi addi bissanni gamba assinoonni irkonni hasiissannonsata rosu uduunni kaa'lo assinanni hee'noonnita coyi'rino . 

‎

‎