Dagoomu Ayyaana Keerunni Ayirrisamanno Gede Qixxaamboommo- Hawaasi Quchum Polisete Biddishsha

***********

Hawaasa, Fooqa 4, 2018 (SBC) 2019 haaru Diri ayyaani keerunni ayirrisamanno gede balaxote qixxaawo assansa Hawaasi Quchumi Gashshooti Polisete Biddishshi xawisino.

Biddishshu Hajajaanchi Antaanchu komishinere Mesaafint Mulugeetihu hajote aana xawishsha uyno.

2019 haaru dirira wo'manta daga hawalle keerunni iillishi'ne yee Hawaasi Quchumi hala'lado dagoomu bissa millissanno quchuma ikkasinni ayyaana ayirrisate amuraati keeraancho ikkanno gede biddishshu balaxote qixxaawo gude afamannota kulinohu aantichu Komishinere wole ragaanni quchumu giddo daddalu ikkito millimilloranna dagoomu dargunni darga hodhanno woyte awaawurshu loossa loossanno mite mite bissa heedhara dandiitannohura qoropho assanno gedenna huluullumannori heeriro qooxeessaho heedhanno polisenna ga'labbote bissara qummi assa hasiissannota xawisino

Wole ragaanni angenna muddamunni oofa hooga, giirate dano xaaddannokki gedeno quchumu teessaano qoropho assitanno gede sokkasi sayse, 2019 M.D Baalante dagara hagiirrunniha lophonniha danchummanniha ikkanno gede halchosi xawisino

Tseddeqe Tseggaye